॥ श्री बजरंग बाण ॥

दोहा

निश्चय प्रेम प्रतीति ते, बिनय करैं सनमान ।

तेहि के कारज सकल शुभ, सिद्ध करैं हनुमान ॥

चौपाई

जय हनुमन्त सन्त हितकारी । सुन लीजै प्रभु अरज हमारी ॥

जन के काज बिलम्ब न कीजै । आतुर दौरि महा सुख दीजै ॥

जैसे कूदि सिन्धु महि पारा । सुरसा बदन पैठि बिस्तारा ॥

आगे जाय लङ्किनी रोका । मारेहु लात गई सुरलोका ॥

जाय बिभीषन को सुख दीन्हा । सीता निरखि परमपद लीन्हा ॥

बाग उजारि सिन्धु महँ बोरा । अति आतुर जमकातर तोरा ॥

अक्षय कुमार मारि संहारा । लूम लपेटि लङ्क को जारा ॥

लाह समान लङ्क जरि गई । जय जय धुनि सुरपुर नभ भई ॥

अब बिलम्ब केहि कारन स्वामी । कृपा करहु उर अन्तरयामी ॥

जय जय लखन प्रान के दाता । आतुर ह्वै दुख करहु निपाता ॥

जै हनुमान जयति बलसागर । सुर समूह समरथ भटनागर ॥

ॐ हनु हनु हनु हनुमन्त हठीले । बैरिहि मारू बज्र की कीले ॥

गदा बज्र लै बैरिहिं मारो । महाराज प्रभु दास उबारो ॥

ओङ्कार हुङ्कार महाप्रभु धावो । बज्र गदा हनु विलम्ब न लावो ॥

ॐ ह्रीं ह्रीं ह्रीं हनुमन्त कपीशा । ॐ हुं हुं हुं हनु अरि उर सीशा ॥

सत्य होहु हरि सपथ पाइ कै । राम दूत धरू मारू धाइ कै ॥

जय जय जय हनुमन्त अगाधा । दुख पावत जन केहि अपराधा ॥

पूजा जप तप नेम अचारा । नहिं जानत हौं दास तुम्हारा ॥

बन उपबन मग गिरि गृह माहीं । तुम्हरे बल हौं डरपत नाहीं ॥

जय अञ्जनि कुमार बलवन्ता । शङ्करसुवन बीर हनुमन्ता ॥

बदन कराल काल-कुल-घालक । राम सहाय सदा प्रतिपालक ॥

भूत प्रेत पिसाच निसाचर । अगिन बेताल काल मारी मर ॥

इन्हें मारू तोहि सपथ राम की । राखु नाथ मरजाद नाम की ॥

जनकसुता हरि दास कहावौ । ताकी सपथ बिलम्ब न लावौ ॥

जै जै जै धुनि होत अकासा । सुमिरत होय दुसह दुख नासा ॥

चरन पकरि कर जोरि मनावौं । यहि औसर अब केहि गोहरावौं ॥

उठु उठु चलु तोहि राम दुहाई । पायँ परौं कर जोरि मनाई ॥

ॐ चं चं चं चं चपल चलन्ता । ॐ हनु हनु हनु हनु हनुमन्ता ॥

ॐ हं हं हाँक देत कपि चञ्चल । ॐ सं सं सहमि पराने खलदल ॥

अपने जन को तुरत उबारौ । सुमिरत होय आनन्द हमारौ ॥

यह बजरङ्ग-बाण जेहि मारै । ताहि कहौ फिरि कवन उबारै ॥

पाठ करै बजरङ्ग-बाण की । हनुमत रक्षा करै प्रान की ॥

यह बजरङ्ग बाण जो जापैं । तासों भूत-प्रेत सब कापैं ॥

धूप देय जो जपै हमेसा । ताके तन नहिं रहै कलेसा ॥

दोहा

उर प्रतीति दृढ़ सरन ह्वै, पाठ करै धरि ध्यान ।

बाधा सब हर करैं सब काम सफल हनुमान ॥