Shivastkam with lyrics - Pujya Rameshbhai Oza
Shiva stotram in Sanskrit. Sung during Maha Shivaratri.
श्री शिवाष्टकम् (प्रभुं प्राणनाथं)
Shivashtakam (Prabhum Prananatham)
प्रभुं प्राणनाथं विभुं विश्वनाथं
जगन्नाथनाथं सदानन्दभाजम्।
भवद्भव्यभूतेश्वरं भूतनाथं
शिवं शङ्करं शम्भुमीशानमीडे॥१॥
गले रुण्डमालं तनौ सर्पजालं
महाकालकालं गणेशाधिपालम्।
जटाजूटगङ्गोत्तरङ्गैर्विशालं
शिवं शङ्करं शम्भुमीशानमीडे॥२॥
मुदामाकरं मण्डनं मण्डयन्तं
महामण्डलं भस्मभूषाधरं तम्।
अनादिं ह्यपारं महामोहमारं
शिवं शङ्करं शम्भुमीशानमीडे॥३॥
वटाधोनिवासं महाट्टाट्टहासं
महापापनाशं सदासुप्रकाशम्।
गिरीशं गणेशं सुरेशं महेशं
शिवं शङ्करं शम्भुमीशानमीडे॥४॥
गिरिन्द्रात्मजासङ्गृहीतार्धदेहं
गिरौ संस्थितं सर्वदासन्नगेहम्।
परब्रह्मब्रह्मादिभिर्वन्द्यमानं
शिवं शङ्करं शम्भुमीशानमीडे॥५॥
कपालं त्रिशूलं कराभ्यां दधानं
पदाम्भोजनम्राय कामं ददानम्।
बलीवर्दयानं सुराणां प्रधानं
शिवं शङ्करं शम्भुमीशानमीडे॥६॥
शरच्चन्द्रगात्रं गणानन्दपात्रं
त्रिनेत्रं पवित्रं धनेशस्य मित्रम्।
अपर्णाकलत्रं सदा सच्चरित्रं
शिवं शङ्करं शम्भुमीशानमीडे॥७॥
हरं सर्पहारं चिताभूविहारं
भवं वेदसारं सदा निर्विकारम्।
श्मशाने वसन्तं मनोजं दहन्तं
शिवं शङ्करं शम्भुमीशानमीडे॥८॥
स्तवं यः प्रभाते नरः शूलपाणेः
पठेत् सर्वदा भर्गभावानुरक्तः।
स पुत्रं धनं धान्यमित्रं कलत्रं
विचित्रैः समाराध्य मोक्षं प्रयाति॥९॥
prabhuṃ prāṇanāthaṃ vibhuṃ viśvanāthaṃ
jagannāthanāthaṃ sadānandabhājam |
bhavadbhavyabhūteśvaraṃ bhūtanāthaṃ
śivaṃ śaṅkaraṃ śambhumīśānamīḍe || 1 ||
gale ruṇḍamālaṃ tanau sarpajālaṃ
mahākālakālaṃ gaṇeśādhipālam |
jaṭājūṭagaṅgottaraṅgairviśālaṃ
śivaṃ śaṅkaraṃ śambhumīśānamīḍe || 2 ||
mudāmākaraṃ maṇḍanaṃ maṇḍayantaṃ
mahāmaṇḍalaṃ bhasmabhūṣādharaṃ tam |
anādiṃ hyapāraṃ mahāmohamāraṃ
śivaṃ śaṅkaraṃ śambhumīśānamīḍe || 3 ||
vaṭādhonivāsaṃ mahāṭṭāṭṭahāsaṃ
mahāpāpanāśaṃ sadāsuprakāśam |
girīśaṃ gaṇeśaṃ sureśaṃ maheśaṃ
śivaṃ śaṅkaraṃ śambhumīśānamīḍe || 4 ||
girindrātmajāsaṅgṛhītārdhadehaṃ
girau saṃsthitaṃ sarvadāsannageham |
parabrahmabrahmādibhirvandyamānaṃ
śivaṃ śaṅkaraṃ śambhumīśānamīḍe || 5 ||
kapālaṃ triśūlaṃ karābhyāṃ dadhānaṃ
padāmbhojanamrāya kāmaṃ dadānam |
balīvardayānaṃ surāṇāṃ pradhānaṃ
śivaṃ śaṅkaraṃ śambhumīśānamīḍe || 6 ||
śaraccandragātraṃ gaṇānandapātraṃ
trinetraṃ pavitraṃ dhaneśasya mitram |
aparṇākalatraṃ sadā saccaritraṃ
śivaṃ śaṅkaraṃ śambhumīśānamīḍe || 7 ||
haraṃ sarpahāraṃ citābhūvihāraṃ
bhavaṃ vedasāraṃ sadā nirvikāram |
śmaśāne vasantaṃ manojaṃ dahantaṃ
śivaṃ śaṅkaraṃ śambhumīśānamīḍe || 8 ||
stavaṃ yaḥ prabhāte naraḥ śūlapāṇeḥ
paṭhet sarvadā bhargabhāvānuraktaḥ |
sa putraṃ dhanaṃ dhānyamitraṃ kalatraṃ
vicitraiḥ samārādhya mokṣaṃ prayāti || 9 ||