जटाटवीगलज्जलप्रवाहपावितस्थले

गलेऽवलम्ब्य लम्बितां भुजङ्गतुङ्गमालिकाम् ।

डमड्डमड्डमड्डमन्निनादवड्डमर्वयं

चकार चण्डताण्डवं तनोतु नः शिवः शिवम् ॥ १॥

जटाकटाहसम्भ्रमभ्रमन्निलिम्पनिर्झरी-

विलोलवीचिवल्लरीविराजमानमूर्द्धनि ।

धगद्धगद्धगज्ज्वलल्ललाटपट्टपावके

किशोरचन्द्रशेखरे रतिः प्रतिक्षणं मम ॥ २॥

धराधरेन्द्रनन्दिनीविलासबन्धुबन्धुर-

स्फुरद्दिगन्तसन्ततिप्रमोदमानमानसे ।

कृपाकटाक्षधोरणीनिरुद्धदुर्धरापदि

क्वचिद्दिगम्बरे मनो विनोदमेतु वस्तुनि ॥ ३॥

जटाभुजङ्गपिङ्गलस्फुरत्फणामणिप्रभा-

कदम्बकुङ्कुमद्रवप्रलिप्तदिग्वधूमुखे ।

मदान्धसिन्धुरस्फुरत्त्वगुत्तरीयमेदुरे

मनो विनोदमद्भुतं बिभर्तु भूतभर्तरि ॥ ४॥

सहस्रलोचनप्रभृत्यशेषलेखशेखर-

प्रसूनधूलिधोरणीविधूसराङ्घ्रिपीठभूः ।

भुजङ्गराजमालया निबद्धजाटजूटकः

श्रियै चिराय जायतां चकोरबन्धुशेखरः ॥ ५॥

ललाटचत्वरज्वलद्धनञ्जयस्फुलिङ्गभा-

निपीतपञ्चसायकं नमन्निलिम्पनायकम् ।

सुधामयूखलेखया विराजमानशेखरं

महाकपालि सम्पदे शिरो जटालमस्तु नः ॥ ६॥

करालभालपट्टिकाधगद्धगद्धगज्ज्वल-

द्धनञ्जयाहुतीकृतप्रचण्डपञ्चसायके ।

धराधरेन्द्रनन्दिनीकुचाग्रचित्रपत्रक-

प्रकल्पनैकशिल्पिनि त्रिलोचने रतिर्मम ॥ ७॥

नवीनमेघमण्डलीनिरुद्धदुर्धरस्फुरत्-

कुहूनिशीथिनीतमःप्रबन्धबद्धकन्धरः ।

निलिम्पनिर्झरीधरस्तनोतु कृत्तिसिन्धुरः

कलानिधानबन्धुरः श्रियं जगद्धुरन्धरः ॥ ८॥

प्रफुल्लनीलपङ्कजप्रपञ्चकालिमप्रभा-

ऽवलम्बिकण्ठकन्दलीरुचिप्रबद्धकन्धरम् ।

स्मरच्छिदं पुरच्छिदं भवच्छिदं मखच्छिदं

गजच्छिदान्धकच्छिदं तमन्तकच्छिदं भजे ॥ ९॥

अखर्वसर्वमङ्गलाकलाकदम्बमञ्जरी-

रसप्रवाहमाधुरीविजृम्भणामधुव्रतम् ।

स्मरान्तकं पुरान्तकं भवान्तकं मखान्तकं

गजान्तकान्धकान्तकं तमन्तकान्तकं भजे ॥ १०॥

जयत्वदभ्रविभ्रमभ्रमद्भुजङ्गमश्वस-

द्विनिर्गमत्क्रमस्फुरत्करालभालहव्यवाट् ।

धिमिद्धिमिद्धिमिद्ध्वनन्मृदङ्गतुङ्गमङ्गल-

ध्वनिक्रमप्रवर्तितप्रचण्डताण्डवः शिवः ॥ ११॥

दृषद्विचित्रतल्पयोर्भुजङ्गमौक्तिकस्रजोर्-

गरिष्ठरत्नलोष्ठयोः सुहृद्विपक्षपक्षयोः ।

तृणारविन्दचक्षुषोः प्रजामहीमहेन्द्रयोः

समप्रवृत्तिकः कदा सदाशिवं भजाम्यहम् ॥ १२॥

कदा निलिम्पनिर्झरीनिकुञ्जकोटरे वसन्

विमुक्तदुर्मतिः सदा शिरःस्थमञ्जलिं वहन् ।

विलोललोललोचनो ललामभाललग्नकः

शिवेति मन्त्रमुच्चरन् कदा सुखी भवाम्यहम् ॥ १३॥

निलिम्पनाथनागरीकदम्बमौलमल्लिका-

निगुम्फनिर्भरक्षरन्मधूष्णिकामनोहरः ।

तनोतु नो मनोमुदं विनोदिनीमहर्निशं

परश्रियः परं पदं तदङ्गजत्विषां चयः ॥ १४॥

प्रचण्डवाडवानलप्रभाशुभप्रचारणी

महाष्टसिद्धिकामिनीजनाऽवहूतजल्पना ।

विमुक्तवामलोचनाविवाहकालिकध्वनिः

शिवेति मन्त्रभूषणा जगज्जयाय जायताम् ॥ १५॥

इमं हि नित्यमेवमुक्तमुत्तमोत्तमं स्तवं

पठन्स्मरन्ब्रुवन्नरो विशुद्धिमेति सन्ततम् ।

हरे गुरौ सुभक्तिमाशु याति नाऽन्यथा गतिं

विमोहनं हि देहिनां सुशङ्करस्य चिन्तनम् ॥ १६॥

पूजावसानसमये दशवक्त्रगीतं

यः शम्भुपूजनपरं पठति प्रदोषे ।

तस्य स्थिरां रथगजेन्द्रतुरङ्गयुक्तां

लक्ष्मीं सदैव सुमुखीं प्रददाति शम्भुः ॥ १७॥

Jaṭāṭavīgalajjalapravāhapāvitasthale

gale'valambya lambitāṃ bhujaṅgatuṅgamālikām |

Ḍamaḍḍamaḍḍamaḍḍamanninādavaḍḍamarvayaṃ

cakāra caṇḍatāṇḍavaṃ tanotu naḥ śivaḥ śivam || 1 ||

Jaṭākaṭāhasambhramabhramannilimpanirjharī-

vilolavīcivallarīvirājamānamūrddhani |

Dhagaddhagaddhagajjvalallalāṭapaṭṭapāvake

kiśoracandraśekhare ratiḥ pratikṣaṇaṃ mama || 2 ||

Dharādharendranandinīvilāsabandhubandhura-

sphuraddigantasantatipramodamānamānase |

Kṛpākaṭākṣadhoraṇīniruddhadurdharāpadi

kvaciddigambare mano vinodametu vastuni || 3 ||

Jaṭābhujaṅgapiṅgalasphuratphaṇāmaṇiprabhā-

kadambakuṅkumadravapraliptadigvadhūmukhe |

Madāndhasindhurasphurattvaguttarīyamedure

mano vinodamadbhutaṃ bibhartu bhūtabhartari || 4 ||

Sahasralocanaprabhṛtyaśeṣalekhaśekhara-

prasūnadhūlidhoraṇīvidhūsarāṅghripīṭhabhūḥ |

Bhujaṅgarājamālayā nibaddhajāṭajūṭakaḥ

śriyai cirāya jāyatāṃ cakorabandhuśekharaḥ || 5 ||

Lalāṭacatvarajvaladdhanañjayasphuliṅgabhā-

nipītapañcasāyakaṃ namannilimpanāyakam |

Sudhāmayūkhalekhayā virājamānaśekharaṃ

mahākapāli sampade śiro jaṭālamastu naḥ || 6 ||

Karālabhālapaṭṭikādhagaddhagaddhagajjvala-

ddhanañjayāhutīkṛtapracaṇḍapañcasāyake |

Dharādharendranandinīkucāgracitrapatraka-

prakalpanaikaśilpini trilocane ratirmama || 7 ||

Navīnameghamaṇḍalīniruddhadurdharasphurat-

kuhūniśīthinītamaḥprabandhabaddhakandharaḥ |

Nilimpanirjharīdharastanotu kṛttisindhuraḥ

kalānidhānabandhuraḥ śriyaṃ jagaddhurandharaḥ || 8 ||

Praphullanīlapaṅkajaprapañcakālimaprabhā-

'valambikaṇṭhakandalīruciprabaddhakandharam |

Smaracchidaṃ puracchidaṃ bhavacchidaṃ makhacchidaṃ

gajacchidāndhakacchidaṃ tamantakacchidaṃ bhaje || 9 ||

Akharvasarvamaṅgalākalākadambamañjarī-

rasapravāhamādhurīvijṛmbhaṇāmadhuvratam |

Smarāntakaṃ purāntakaṃ bhavāntakaṃ makhāntakaṃ

gajāntakāndhakāntakaṃ tamantakāntakaṃ bhaje || 10 ||

Jayatvadabhravibhramabhramadbhujaṅgamaśvasa-

dvinirgamatkramasphuratkarālabhālahavyavāṭ |

Dhimiddhimiddhimiddhvananmṛdaṅgatuṅgamaṅgala-

dhvanikramapravartitapracaṇḍatāṇḍavaḥ śivaḥ || 11 ||

Dṛṣadvicitratalpayorbhujaṅgamauktikasrajor-

gariṣṭharatnaloṣṭhayoḥ suhṛdvipakṣapakṣayoḥ |

Tṛṇāravindacakṣuṣoḥ prajāmahīmahendrayoḥ

samapravṛttikaḥ kadā sadāśivaṃ bhajāmyaham || 12 ||

Kadā nilimpanirjharīnikuñjakoṭare vasan

vimuktadurmatiḥ sadā śiraḥsthamañjaliṃ vahan |

Vilolalolalocano lalāmabhālalagnakaḥ

śiveti mantramuccaran kadā sukhī bhavāmyaham || 13 ||

Nilimpanāthanāgarīkadambamaulamallikā-

nigumphanirbharakṣaranmadhūṣṇikāmanoharaḥ |

Tanotu no manomudaṃ vinodinīmaharniśaṃ

paraśriyaḥ paraṃ padaṃ tadaṅgajatviṣāṃ cayaḥ || 14 ||

Pracaṇḍavāḍavānalaprabhāśubhapracāraṇī

mahāṣṭasiddhikāminījanā'vahūtajalpanā |

Vimuktavāmalocanāvivāhakālikadhvaniḥ

śiveti mantrabhūṣaṇā jagajjayāya jāyatām || 15 ||

Imaṃ hi nityamevamuktamuttamottamaṃ stavaṃ

paṭhansmaranbruvannaro viśuddhimeti santatam |

Hare gurau subhaktimāśu yāti nā'nyathā gatiṃ

vimohanaṃ hi dehināṃ suśaṅkarasya cintanam || 16 ||

Pūjāvasānasamaye daśavaktragītaṃ

yaḥ śambhupūjanaparaṃ paṭhati pradoṣe |

Tasya sthirāṃ rathagajendraturaṅgayuktāṃ

lakṣmīṃ sadaiva sumukhīṃ pradadāti śambhuḥ || 17 ||

Iti Śrī-Rāvaṇa-kṛtaṃ Śivatāṇḍavastotraṃ sampūrṇam ||