अनंता तुला ते कसे रे स्तवावे ।

अनंता तुला ते कसे रे नमावे ।।

अनंत मुखांचा शिणे शेष गाथा ।

नमस्कार साष्टांग श्रीसाईनाथा ।। १ ।।

स्मरावे मनी त्वत्पदा नित्य भावे ।

उरावे तरी भक्तिसाठी स्वभावे ।।

तरावे जगा तारुनी मायताता ।

नमस्कार साष्टांग श्री साईनाथा ।। २ ।।

वसे जो सदा दावया संत लीला ।

दिसे अज्ञ लोकापरी जो जनाला ।।

परी अंतरि ज्ञान कैवल्यदाता ।

नमस्कार साष्टांग श्री साईनाथा ।। ३ ।।

बरा लाधला जन्म हां मानवाचा ।

नरा सार्थका साधनीभूत साचा ।।

धरु साईप्रेमा गळाया अहंता ।

नमस्कार साष्टांग श्री साईनाथा ।। ४ ।।

धरावे करी सान अल्पज्ञ बाला ।

करावे आम्हा धन्य चुंबोनि घाला ।।

मुखी घाल प्रेमे खरा ग्रास आता ।

नमस्कार साष्टांग श्री साईनाथा ।। ५ ।।

सुरादिक ज्यांच्या पदा वंदिताति ।

सुरादिक ज्यांचे समानत्व देती ।।

प्रयगादि तीर्थेपदि नम्र होता ।

नमस्कार साष्टांग श्री साईनाथा ।। ६ ।।

तुझ्या ज्या पदा पाहता गोपबाली ।

सदा रंगली चित्स्वरुपि मिळाली ।।

करी रासक्रीड़ा सवे कृष्णनाथा ।

नमस्कार साष्टांग श्री साईनाथा ।। ७ ।।

तुला मागतो मागणे एक द्यावे ।

करा जोडितो दिन अत्यंत भावे ।।

भवि मोहनीराज हा तारी आता ।

नमस्कार साष्टांग श्री साईनाथा ।। ८ ।।